Liwapayikira paapa wahura ndi tundamo – Makgone

By IAfrica
In Namibia
Apr 9th, 2014
0 Comments
92 Views

KEETMANSHOOP -Ministeragona gerongo Sylvia Makgone katanterere varongi momukunda gwa//Karas asi nsene kapi ono kuvhura nonkambadaro hetekerako ndi tundamo tupu mourongi. Age kakere momudwaro ogu ana tura mwene pwantani asi yigo nye ana kudwara nsene tadingura nomukunda.

Makgone kageve egano lyendi omu ana kupira kuyizuvhira mbili asi erongo ngapi vana kuligendesa posiruwo oso kakere nosigongi kumwe novarongi, vakurona sure, vareti wovanona, vanona ntani komitiye zegendeso sure awo kavapongerere posure zaSuiderlig sekondere.  Mokukwama mwendi age kuna kutanta asi nosure nadinye edi kadingwire vanona kuna kara tupu noyirugana sure vavapa yinasiki kwayine, kutunda tupu apa zamanguruka sure.

Ano kuhamena vamitili kuna karamo tupu nyame, nyame. Ano tuna divara asi sure kapi tazivhuru kukakarako nsene kwato vanona. Ame kuna kumona asi koyili yina kuhoroka nye eyi kuna kara tupu yokuviva komeho,kwato yina kuhoroka. Eyi nayikulikida asi koyili yina kuhoroka nsene totara mbapira zomunona. Ame kuna tara nombapira dovarongwa nye kwato eyi yina likidange asi varongwa ava kuna kuvaronga. Ame kapi ninayizuvhire mbili morwa kuna mono asi kutunda tupu apa zapaturuka sure mapenuno gane tupu varuganesa muna hamene yirugana varugana nayo yine hena.

Age katente asi vamitili awo kuna kulipopera asi vanona kapi ava vhuru kuresa ndi kutjanga. Kapi mwayidiva asi munona nsene kapi ana kuresa ndi kutjanga nove murongwa ngoso yina kugumu.Konda eyi vatumina vakurona vanona ava kosure morwa kwamuhuguvara, ntani one hena kwagwana madeuro asi murugane sirugana oso. Ove kuna kugazara asi munwanange ogu nareta tupu nakumureta nare ana diva kuresa nokutjanga? Age kapulire epuro olyo kovamitili kavakeremo.Age kahundilire vamitili asi vahepa kulituramo ntani vahepa nsene munona anadopa nawo kulizuvha udona kapisi vahafe nye asi kapisi yiwo vanadopa.

Yinke yna kutanta nsene asi murongwa gontambo zomurongo kapi ana kudiva kuresa ntani kapi ana kugwana asi yinke mpamwe nomu nayiresa. Ntani age kahomokerere vatareli wonosure asi nawo vahepa kutambura edopo lyovanona ava, nye vahepa kutara asi udigu musinke vana kara nawo eyi vana kudopa ngesi, vahepa kudingura nosure nokugwana udigu naunye.”  Ame kwato nampili yitundwamo yongandi ninagwana komutareli sure ponosure nadinye edi ninadingura.” Kwato nampili gumwe mitili vatjangera asi kwarugana epuko nye awo vamitili owo kwato eyi vana kurugana. Eyi kuna kara nye umbondo kutarerera yirugana yoge, yina kutwaredera asi munona kapi takadiva kuresa ndi kutjanga.

Awo kunakuvatarerera mongendeseso zerongo. Morwa sinke nani tundira koVenduka niyamutantere asi apa kuna karapo udigu? Siruwo oso ose kuna kara nonompitisili momukunda. Yimo ana kupura ngoso Makgone. Age simpe katente asi vamitili vamwe ngano kapi vana wapere kugwana yimaliva yawo vahepa tupu kuyitengwida kepangero. Ose kuna kara noyimaliva tuna kuvaka ntani eparu nalyo kuna kulivaka. Tareni tupu vanona ava tuna kandwire mononzira. Siruwo esi kuvhura tulyeni yimaliva nye twahepa kudiva asi siruwo ngasi wiza ngavayitupura asi yimaliva eyi ngogwana yinke ngoyigwanene? Age simpe kapulire nye komitiye zegendeso asi morwa sinke mwatarerera mukaro gwangesi gutwikire. Yinke mwaruganako kedopo lyovanona nkenye mvhura?Ngovakurona, kuna karerepo vakurona vakweneni,  ngapi nye omu omu twara udigu ou kovakurona vakweneni. Mwahetekerako nampili ezuva limwe muzigide sigongi nokutanta asi vana veni kuna kudopa unene? Makgone simpe kahundilire vakurona asi vahepa kupisura vana vawo komeho vavatume kosure. Yipo asi mwahayapa varongi velike umbondo asi kapi vana kudeura vana veni ano one nyamweni kunakuvasiga vakare nomukaro dona. Ministeragona gerongo kakadingwire nosure muyu , momukunda gwa//Karas , mavango ngwendi Berseba, Koes ntani Keetmanshoop siruwo oso kakere tadingura.

This post has already been read 1 times!


Comments are closed.